مش عاوز لف ولا دوران انا جيت ليكى دوغروى ليش سويتى هيك
يا ترى ايه السؤال اللي اتسأل لسها
انا عن نفسىى حشوف الحلقة واعرف تحبوا انتوا كمان تعرفوا
يالا … تعالوا نتابع احداث مسلسل قسمة علي اتنين والحلقة العاشرة يارب تعجبكم
نهي على
مسلسل / قسمة على إتنين
قصة وسيناريو وحوار / نهى على طه
الحلقة العاشرة
مشهد (1) ليل خارجى / شط إسكندرية (فلاش باك )
ـــــــــ قطع ــــــــــــ
مشهد (2) ليل خارجى / منزل سها وفراولة / الشرفة
سها واقفة تنشر الغسيل وتشبك المشابك فريال تناولها قطع الغسيل وعلى ملامحها الغيظ الشديد وفى نبرة توبيخ وغيظ :
والله أنا حتشل منك حتموتنى ناقصة عمر يا سها يا نهار أسود ترفضى ملياردير
شاهر دا عامل بالظبط زى السلطان إللى شاف بت غلبانة وقرر يخليها سلطانه
سها فى نبرة غير مبالية وهى تكمل باقى النشير :
يا أدى حواديت أبله فضيلة إللى مش عاوزة تكبرى عليها يا بنتى ما ملك إلا الله وحده وبعدين أنا مش عاوزة أتجوز وقولت الكلام دا للإستاذ عامر لما سألنى دى الحقيقة حياتى عاجبانى كدا من غير راجل
فريال تكاد تشد شعرها وتنظر لسها وفى نبرة شبة هستريا :
إنتى أكيد مجنونة دا ميترفضتش إنتى بتقولى سنه مناسب ووقور وراسى وشخصيته حلوة يعنى المواصفات إللى إنتى عاوزاها وفوق كل دا غنى غنى بالهبل وحعيشك فى دبى حرام عليكى
سها تضحك وفى إقتراح :
طيب أنا أقول لإستاذ عامر عليكى يتجوزك
فريال تنظر لها فى عتاب وفى نبرة تأنيب خفيفة :
بتريئى حضرتك ماشى يا سها
سها تضع يدها على كتفها وفى نبرة إعتذار :
والله ما أقصد أتريأ خالص وبعدين كويس إن الموضوع دا إتفتح عشان بصراحة بقا عاوزة أخد معاكى كلمة لطاهر إللى مستنى رد دا وأخرتها يا فريال
فريال تنظر لسها والدموع غائمة فى العين
فراولة فى نبرة شجينة مليئة باليأس :
قولي له يشوف حاله أنا مبتجوزش
سها فى نبرة غيظ :
أنا إللى حموت ناقصة عمر منك مش إنتى ليه
يا فريال مش معنى إن غالبية عيلتك جالها المرض دا إنك حتبقى زيهم دى عقده ولازم تشيلها وبعدين إنتى بتعملى فحص دورى والدكتور الحمد لله بيطمنك يبقى لأ ليه ؟
فريال تمسح الدمعة التى سقطت على خديها بكفيّها وفى نفس النبرة :
الدكتور قالى بصراحة فى إحتمال إصابتى بالمرض عاوزانى أتجوز وأخلف وأسيب عيال تتيتم وتبقى زى ولا أسيبهم لمرات أب تطلع عينيهم زى ولاد خالتى إللى فى مصر شايفين المرار والنكد لأ أنا أقدر على نفسى عايشة بالطول والعرض من غير ضحايا ليا طالما مبعملش حاجة غلط حعمل إللى أنا عاوزاه وبعدين ما أنا عندى ولد أدم دا يبقى إيه دا ابنى ليا فيه زى ما ليكى بالظبط مش ناقصنى حاجة
فريال تزفر زفرة سئم وفى نبرة زهق :
كملى الغسيل بتاعك أنا نازلة أسهر مع العيال وإنتى حرة خليكى عايشة فى الفقر فقرية
سها تطلق تنهيدة قصيرة وفى تساؤل :
حتتأخرى مع شلة الأونص
فراولة نافية :
لأ حقعد شوية وأجى سلام
فريال تترك سها وتدخل من الشرفة
سها تحدث نفسها وهى تكمل بقية النشير :
ربنا يهديكى يا فراولة
ــــــــــــ مزج ــــــــــــــ
مشهد (3) ليل خارجى / خارج مكتب عامر زهران / الشارع الرئيسى
سها تخرج من المكتب وتسير فى الشارع بمفردها سيارة شاهر تقترب منها
شاهر يطل برأسه وينادى :
مدام سها … ست سها
سها تنظر وتنظر فى دهشة للحظات وصمت
سيارة شاهر تتوقف وشاهر ينزل من السيارة
شاهر فى لهجة هادئة رقيقة :
مدام سها كيفك
سها فى إقتضاب وهى تتلفت يمينا ويسارا :
الحمد لله
شاهر يلاحظ توتر سها وفى طلب :
بدى أحكى معك شغله وما تقلقى ما حاخد من وقتك كتير
سها فى إرتباك وحرج :
شاهر بيه أنا يدوبك أروح إتأخرت على إبنى وأظن حضرتك عرفت ردى من إستاذ عامر
شاهر فى رجاء :
من فضلك لو سمحت دى شغله كتير مهمة وجسم بالله ما حعطلك
سها تهز رأسها فى إرتباك وإستسلام
شاهر يفتح لها باب السيارة
سها تجلس وهو بجوارها فى المقعد الخلفى
السائق ينطلق بالسيارة
ــــــــــــــ مزج ـــــــــــــ
مشهد (4) ليل داخلى / داخل مطعم كبير فاخر
شاهر وسها جالسان حول طاولة مستديرة أنيقة عليها مشروبان باردان
سها تنظر لشاهر وفى نبرة حرج وإعتذار :
شاهر بيه والله حضرتك ما تتعيب أبدا بس فكرة الجواز دى مش فى دماغى نهائى وإسأل إستاذ عامر يقولك إنى رفضت ناس إتقدملتى أنا عايشة لإبنى والحمد لله
شاهر فى نبرة إعجاب وصدق :
والله العظيم مصدقك يا بنت الناس
سها تنظر بإندهاش للهجة شاهر
شاهر يضحك ضحكة صافية وفى نبرة فهم :
متستغربيش كدا أنا بتكلم مصرى لبلب أحسن منك أنا بن مصرية
سها تضحك ضحكة قصيرة شاهر ينظر لعينى سها وفى نبرة جدية :
وإسمها يسرية الدراملى كمان
الضحكة تموت فوق شفتى سها وتتراجع للوراء فى صدمة وخوف حقيقى
سها تمسك حقيبتها وتكاد تنهض لتجرى
شاهر يمسك كفها بقوة وفى نبرة أمره صارمة :
إقعدى … بقولك إقعدى الناس خدت بالها
سها تجلس وتحاول السيطرة على نفسها لكنها تعجز
سها فى إنفعال خارج عن إرادتها :
إنت عاوز منى .. مكفكوش إللى عملتوا فيا … عاوزين منى إيه سيبونى فى حالى أنا بعدت عنكم
شاهر ينظر لوجه سها المذعور نظرة إشفاق
شاهر فى نبرة مطمئنة :
متخافيش وإهدى عشان نعرف نتكلم
سها فى إضطراب :
نتكلم فى إيه مفيش حاجة تربط بينى وبينكم خلاص
شاهر ينظر لها ويهز رأسه نافيا
شاهر فى ثقة :
لأ فيه بن أخويا
سها فى إدعاء كاذب :
دا مش بن أخوك أنا نزلت الجنين
شاهر فى نبرة حزم :
أنا جيتلك دوغروى بلاش لف ودوران لأ أدم بن على وإنتى زورتى وكتبتيه على إسم جوزك إللى إتوفى ممكن أعرف عملتى ليه كدا ؟
سها تحاول كتم دموعها وترسم إبتسامة ساخرة وفى مرارة ووجع :
البركة فى الست والدتك إللى بعتت ليا ناس يقتلونى أنا وإللى فى بطنى وإللى كلت العلقة صاحبتى رقدت فيها تلات شهور بعدها هربت خفت إمال لو كنت كتبته باسم أخوك كانت عملت إيه دى إيدها طايلة ربنا ينتقم منها
شاهر فى نبرة حزينة :
ربنا خدت حقك منها
سها فى تعاسة :
حقى إيه ماتت
شاهر نافيا :
عايشة ميته كل واحد خد نصيبه حتى على
سها تذرف الدمعة لما يأتى اسم على
سها فى مرارة قوية وجرح :
نصيبه صح بأمارة جوازه وحياته السعيدة
شاهر فى نبرة شجينة :
كل واحد بيعانى بطريقة شكل يا سها ما علينا المهم مش دا موضوعنا
من الأخر وبدون مقدمات أنا عرضت عليك الجواز وكان إختبار منى ليك ونجحتى فيه رفضك ليا عرفنى إن على مغلطتش لما إختارك وعشان كدا أنا بعرض الجواز عليكى بس مش زى ما إنتى متخيلة أنا عاوز أربى بن أخويا مع بنى فى نفس المستوى إللى إتربى فيه أبوه ويمكن أحسن وأعوضك إنتى كمان على الأضرار إللى حصلتلك بسببنا
سها فى دهشة وعدم فهم :
إنت مش مطالب بكدا وقدام الناس أدم ميمتش بصله لعيلة بدر الدين أو حضرتك
شاهر فى نبرة صادقة بها الأخلاق والرجولة :
دا قدام الناس لكن قدام الله لأ أنا عرفت وكنت عارف زمان إللى حصل ولقيتك صدفة مينفعش أتركك مش أنا الراجل إللى بيرمى لحمه أهل أبويا ربونى على كدا
وقدرى إنى ألم مصايب إخواتى وإللى عملوا جوازنا حيكون قدام الناس بس لكن بينى وبينك إنتى أختى الصغيرة مرت أخويا السابقة وأم ولده فاهمة
سها تنظر لشاهر نظرة طويلة وكأنها تقرأه عيناه
سها تبتسم إبتسامة خفيفة وفى طلب :
موافقة بس ليا طلبين :
شاهر يرفع كفه وفى حماس :
كل طلباتك على الرأس قولى
سها فى هدوء :
أخوك ميعرفش إن له بن والتانى صاحبتى فريال معايا
شاهر ينظر لها وفى نبرة موضحة :
صاحبتك تكرم طبعا من غير كلام وموضوع الحكى لعلى ما حدش عارف الدنيا مخبية إيه بس كل للى أوعدك بيه إنك حتكونى بأمان معى إن شاء الله
سها تنظر له وفى نبرة مصدقة :
أنا متأكده من دا موافقة يا شاهر بيه
ـــــــــــ مزج ـــــــــــــــ
مشهد (5) ليل خارجى / شقة شاهر / الشرفة
سها تفيق من ذكرياتها وفى نبرة حزينة ومعاتبة :
ووافقت يا شاهر وإتجوزتك وحافظت على إسمك عمرى ما خالفتك وحبيت خالد زى أدم وأكتر وقولت ربنا عطانى بدل الولد إتنين وعمره ما حسيبه أبدا
أنا نفذت يا شاهر لكن إنت خلفت وعدك معايا ليه … ظهرت على فى حياتى تانى ليه حطيت شرط الوصية السخيفة دى ليه مبقتش عارفة أقولك الله يرحمك على كل حاجة حلوة عملتها عشانى ولا الله يسامحك على وصيتك وشرطك أه يا سها من المكتوب وإللى جى محدش عارف الدنيا لسه شايلة لك إيه
سها تطلق تنهيدة طويلة وتدخل من الشرفة
ـــــــــــــــ قطع ـــــــــــــــــ
مشهد (6) منظر عام لجامعة عين شمس / كلية حقوق
ــــــــــــــ قطع ـــــــــــــــــ
مشهد (7) نهار داخلى / مدرج كلية حقوق
الطلبة جالسين فى المدرج وعلى جالسا فوق المنصة يتحدث بوقار
على فى نبرة هادئة :
كل سنه وإنتم طيبين العام الدراسى الجديد وأنا سعيد إنى متواجد معاكم وأدرس لكم مادة القانون الجنائى وعلى فكرة أنا من سنين طويلة كنت طالب هنا زيكم يالا شدوا حيلكم عشان تبقوا مكانى
المدرج يصفق فى حرارة
على يبدأ بشرح المحاضرة
ـــــــــــــــ قطع ـــــــــــــ
مشهد (8) كلية حقوق / حجرة مكتب على من الداخل
على يفتح باب الحجرة ويدخل ويضع حقيبته الجلدية فوق سطح المكتب
على يجلس لكنه يسمع رنين جرس الموبايل
على يبتسم وفى نبرة حانية :
خلود حبيبى إزيك عامل إيه
على فى إعتذار حان :
أسف يا حبيبى أنا فعلا إتشغلت الفترة إللى فاتت عنكم
قولى إنتوا عاملين إيه
على فى إنزعاج :
ماله أدم
إلى اللقاء فى الحلقة القادمة إن شاء الله
يتبع ………….
